«Өмір жылуы» фотокөрмесі волонтерлерді бірігуге үндейді…

Осыдан он төрт жыл бұрын бір бастаманың арқасында Қазақстанда «28 ілмек» клубы атты волонтерлік қозғалыс пайда болды. Уақыт өте келе ол халықаралық қауымдастыққа айналып, 14 елден еріктілерді біріктірді. Клубтың перілері 100% жүннен шала туған сәбилерге арнап шұлық, бас киім, кеудеше және көрпе тоқиды. Бұл бұйымдар жылуды сақтауға көмектеседі, рецепторларды ынталандырады және балаларды күту кезінде қосымша қолдау ретінде қолданылады. Негізгі қызметінен бөлек, клуб перілері тұрақты түрде қайырымдылық және қоғамдық жобаларға қатысады. Осындай шаралардың бірі - Волонтерліктің халықаралық жылын қолдау мақсатында Қосшы қаласындағы «28 ілмек» клубы ұйымдастырған «Өмір жылуы» фотокөрмесі болды. Shanger.kz көрмеге барып, жобаға қатысушылармен және қонақтармен тілдесті.

Анықтама үшін: «28 ілмек» клубы Қазақстан, Ресей, Украина, Беларусь, Өзбекстан, Латвия, Қырғызстан, Әзербайжан, Грузия, Молдова, Эстония, Германия, Тәжікстан және Армения елдерінде жұмыс істейді.

- 2026 жылдың волонтерлікке арналатынын білгенде, оның жай ғана ресми тұжырым болып қалмағанын қаладым, - дейді Қосшы клубының үйлестірушісі Анара Жабаспаева. - Осылайша фотокөрме идеясы туды. Сол арқылы біз бір кеңістікте 28 ұйымды жинап, волонтерлік бастамалардың әрқайсысы жеке-жеке өмір сүрмеуі керек екенін көрсете алдық. Сонымен бірге біз үшін негізгі жұмысымыздан алыстамау маңызды болды: жоба жүріп жатқан кезде клубымыз Көкшетау перинаталдық орталығына жинақтар беруді жалғастырды.

Қосшы қаласындағы «28 ілмек» клубының феясы Нурхамитова Мерекеапай шөбересімен бірге.

- Менің «28 ілмек» клубындағы жолым 2020 жылы, Қосшыдан алғаш рет астаналық филиалға келген кезде басталды, - дейді Анара. - Ол кезде жолға көп уақыт кететін, бірақ мен бірде-бір кездесуді жібермейтінмін. Уақыт өте келе клуб Қосшыда да ашылуы керек деген ой жиі мазалай бастады. Біртіндеп, қадам сайын, біздің команданың негізіне айналған құрам қалыптасты. Біздің клуб өз қарауындағы мекемелерге тоқып қана қоймай, басқа қалалар мен тіпті басқа елдерге де қолдау көрсете бастады. Біз Талдықорғанға көмектестік, су тасқыны кезінде Петропавлға заттар жібердік, Тәжікстанға жинақтар жолдадық, кейін Көкшетау перинаталдық орталығын қамқорлыққа алдық. Менің перілерім үшін «28 ілмек» клубы - сәбилерді қолдау ғана емес, олардың күнделікті өмірінің бір бөлігіне айналып кеткен іс.

- Мен бұл клубта ең басынан бері, міне, шамамен бес жылдан бері жүрмін, - дейді пері Баян апай. - Мен үшін бұл жұмыстың нәтижесін көру ерекше маңызды: балалар өсіп, ширап, күліп, өмір жолын жалғастырып жатады. Осындай сәбилер мүмкіндігінше аз дүниеге келсе екен, ал ата-аналар уайымнан гөрі қуанышты сәттерді көбірек бастан өткерсе екен деймін. Әрине, бір кездері осы клубты құрып, көпшілігімізге пайдалы болуға мүмкіндік берген адамға алғысым шексіз.

Фотосурет Астанадағы Ұлттық ғылыми ана мен бала орталығында түсірілген.

Көрме қонақтарының арасында кішкентай Айлин де анасымен бірге болды. Қыз бала шала туған, бір кезде оны күту барысында клуб перілері тоқыған жинақтың да өз орны болған.

- Мен ата-анамды қатты жақсы көремін және олардың әрдайым жанымда болғанын қалаймын, - дейді Айлин. Мен үшін отбасым - ең керемет отбасы, мен анам мен әкемнің әрдайым аман-есен, бақытты болғанын қалаймын. Оларға махаббаты, қамқорлығы және мені әрдайым қорғап жүргені үшін алғыс айтқым келеді. Мен өскенде неонатолог болғым келеді.

- Қызым жүктіліктің 23-аптасында, небәрі 600 грамм салмақпен дүниеге келді, - дейді Айлиннің анасы Гульнара Маулетбаева. Оның өмірінің алғашқы айлары жансақтау бөлімінде өтті, ӨЖЖ-да ұзақ жатты, Израильде ота жасалды, өздігінен тыныс алуға дейінгі жолы ұзақ болды. Бір күні бөлімшеге келгенімде, мен алғаш рет баланың үстінен «28 ілмек» клубының жүннен тоқылған жинағын көрдім. Алғашында бұл мені алаңдатты: неге баланың үстінде жүннен тоқылған киім бар, оның қандай көмегі болуы мүмкін - түсінбедім.

Фотосурет Астанадағы Ұлттық ғылыми ана мен бала орталығында түсірілген.

- Кейін дәрігерлер мұндай жинақтар жылуды сақтауға көмектесетінін және апноэнің алдын алудың қосымша тәсілі ретінде қолданылатынын түсіндірді, себебі жүн терідегі рецепторларды тітіркендіріп, баланың қимылдауына әсер етеді, демек, тыныстауды ұмытпауына ықпал етеді. Уақыт өте келе біздің отбасымыз ауыр кезеңнен өтіп жатқанда, біреудің Айлин үшін жинақ тоқып, әкеліп бергенін түсіндім. Бүгінде мен басқа отбасылар үшін кезінде біз үшін жасалған жақсылықты жасағым келеді.

Клуб үшін олардың еңбегін Қазақстандағы шала туған балаларды күту жүйесінің бастауында тұрған мамандардың көріп, қолдауы ерекше маңызды. Көрменің осындай қонақтарының бірі - Қазақстандағы неонатологияның негізін қалаушы Тамара Құрманғалиқызы Чувакова болды. Оның пікірі медицина қауымдастығы үшін айрықша салмаққа ие.

- Бүгінде Қазақстанда шала туған балаларды күту жақсы деңгейге қойылған, бірақ қосымша қолдау құралдарынсыз медициналық көмектің өзі жеткіліксіз, - дейді Тамара Құрманғалиқызы. - Дәл сондықтан «28 ілмек» клубының жұмысы нақты маңызға ие. Жүннен тоқылған бұйымдар жылуды сақтауға көмектеседі және гипотермиямен байланысты асқыну қаупін азайтады. Ең маңыздысы - Қазақстанда басталған бұл тәжірибе бір елдің шеңберінен әлдеқашан асып, бүгінде 14 елге таралған.

Фотосурет Астанадағы Ұлттық ғылыми ана мен бала орталығында түсірілген.

Көрменің ашылуында клуб перілері тоқыған жинақтармен байланысы бар қорлар мен волонтерлік бірлестіктердің өкілдері де болды. Олардың қатарында: НВС, «Мархабат», Best for Kids, «Волонтеры Астаны LIDER.KZ», «Шаңырақ» қоры және Алматыдан келген The First ұйымы бар.

- Мен бірден бірнеше ұйымның атынан келіп отырмын, сондықтан мұндай кездесулердің құндылығын ерекше жақсы түсінемін, - дейді НВС, «Мархабат» және Best for Kids өкілі Дарья Меренцова. Мен үшін бұл көрме - волонтерлік туралы нақты іс пен бір-бірінің еңбегіне деген құрмет арқылы айтуға болатынының үлгісі. Ұйымдар бірігіп, ортақ тұстарын іздеген кезде, нәтиже әркім жеке әрекет еткеннен әлдеқайда ауқымды болады.

- Мен үшін бұл шараға қатысудың эмоциялық жағынан мәні өте зор, - дейді «Волонтеры Астаны LIDER.KZ» ұйымының жетекшісі Айзада Жусупова. Клуб перілерінің жасап жүрген ісін жай ғана қоғамдық белсенділікке теңеуге болмайды, бұл - баланың өміріне алғашқы күндерінен бастап әсер ететін нақты көмек. Соңғы жылдары қоғамның волонтерлерге деген көзқарасы едәуір өзгерді: бұрын көп адам неге адамдар қайырымдылықпен тегін айналысады деп түсінбейтін, ал қазір волонтерлік - кемел әрі жауапты қоғамның маңызды бөлігі екені барған сайын айқын көрініп келеді.

- Бұл шараға Теміртаудан келдім, - дейді «Шаңырақ» қорының өкілі Нағызбек Мекен. «28 ілмек» клубының қызметімен танысқаннан кейін менде мұнда шала туған балалар тақырыбына деген құрмет қана емес, волонтерлік еңбектің өзіне деген байыпты көзқарас бар деген әсер қалды.

- Мен Алматыдағы The First ұйымының атынан келдім, - дейді Шырынбек Сезин. - Мен үшін бұл көрмеге шақырылу «28 ілмек» клубының өз жұмысы туралы нақты нәтиже және басқа волонтерлік ұйымдарға деген құрмет арқылы қалай сөйлейтінін көруге мүмкіндік болды.

Фотосурет Астанадағы Ұлттық ғылыми ана мен бала орталығында түсірілген.

Қосшыдағы фотокөрме «28 ілмек» клубының перілері тек негізгі жұмыстарымен - шала туған балаларға көмектесумен ғана айналыспай, басқа қайырымдылық ұйымдары мен волонтерлермен де байланыс орнатуға ұмтылатынын көрсетті. Бәлкім, қоғамдық ынтымақтың басты мәндерінің бірі де осында шығар: біріге отырып, біз әлдеқайда көп іс тындыра аламыз.

«Өмір жылуы» фотокөрмесіне арналған жинақтарды тоқығандар: Жабаспаева Анара, Ковтун Валентина, Лях Наталья, Баетова Галина, Баетова Бахытгуль, Нуркенова Балжан, Годунова Антонина, Байболова Шолпан, Жанибеккызы Меруерт, Байзакова Роза, Атемкулова Жанара, Баетова Айнура, Аманжолова Кымбат, Татьяна Цуранкова, Куанышбаева Молдир, Лилия Ильина, Мынбаева Шолпан, Жолдасбекова Карагоз, Джумадилова Бахыт, Кемешова Ляззат.

Қосшы қаласындағы «28 ілмек» клубы Астанадағы Ұлттық ғылыми ана мен бала орталығында сәбилердің фотосессиясын ұйымдастыруға қолдау көрсеткені үшін реанимация бөлімінің меңгерушісі Абентаева Ботагөз Әбубәкірқызына және ОВН бөлімінің меңгерушісі Тортаева Гүлнар Сағиқызына шынайы алғысын білдіреді.