Rainbow Logistics Қазпоштаға қалай қолайлы жағдай жасайды

Байланыс және ақпарат қызметкерлері күні қарсаңында Shanger.kz пошта, цифрлық және сауда сервистерінің тұрақты жұмысы мүмкін болмайтын сала туралы материал әзірледі. Қазіргі логистика бұл жай ғана жылдам жеткізу емес, әрбір бөлшегі маңызды тұтас жүйе: техниканың қозғалысын ұйымдастырудан бастап қызметкерлерге арналған душ кабиналарының болуына дейін. Rainbow Logistics компаниясы осындай жағдайлар жасауға айрықша көңіл бөледі. Оның негізгі серіктестерінің бірі — «Қазпошта» АҚ. Бұл ұлттық операторға сұрыптау үдерісін жаңғыртып қана қоймай, қызметкерлердің еңбек жағдайын да едәуір жақсартуға мүмкіндік берді.

— Rainbow Logistics компаниясының басшысы ретінде атап өткім келетіні, біздің міндетіміз жай ғана қойма алаңдарын жалға беру емес, клиенттеріміз үшін барынша тиімді жағдай жасау, – дейді Айбек Тұрсынғалиев. Біз жабдықтардың техникалық жай-күйіне, электр энергиясымен, жылумен, сумен үздіксіз қамтамасыз етілуіне ерекше назар аударамыз. Біздің қызметіміз нарықтағы үрдістерді тұрақты түрде бақылау мен талдауды қамтиды. Ozon және «Қазпошта» АҚ сияқты компаниялармен ынтымақтастық бізді жаңа стандарттар мен технологияларды енгізуге ынталандырды. Біз үшін клиенттеріміз ешқашан сапалы қойма орындарының тапшылығына тап болмауы маңызды.

Айбек Тұрсынғалиев қоймалық логистика кеңістікті оңтайландыруды ғана емес, сонымен қатар мұқият ойластырылған инфрақұрылымды да қажет ететінін атап өтеді. Мұнда жарықтандырудан бастап техниканың қозғалыс маршруттарын ұйымдастыруға дейінгі барлық жайт ескерілген. Бұл сәлемдемелерді өңдеу жылдамдығына тікелей әсер етеді, түптеп келгенде клиенттердің қолайлылығын арттырады.

Айырмашылықты алғашқылардың бірі болып сезінгендердің бірі — «Қазпошта» АҚ ақпараттық-логистикалық орталығы филиалының өңірлік директоры Мәди Сабденбеков.
— Бұрын біздің қоймаларымыз кеңестік кезеңнен қалған ескі ғимараттарда орналасқан еді, ондағы жағдайлар жайлы деуге мүлде келмейтін. Жаңа нысанды таңдаудағы басты өлшемдердің бірі — логистика тұрғысынан қолайлы орналасуы және қызметкерлер үшін жайлы жағдайдың болуы. Себебі, егер жұмысшыларға жасалған жағдай жақсарса, олардың өнімділігі артады, демек поштаны өңдеу үдерісі де жылдамдайды, нәтижесінде клиент те риза болады. Біз Rainbow Logistics ұсынған жағдайларды таңдадық. Жаңа ғимарат заманауи талаптарға толық сай: өртке қарсы жабдық орнатылған, ыңғайлы киім ауыстыратын бөлмелер, асхана, санитарлық тораптар қарастырылған.

– Біздің логистикалық орталық арқылы күніне 30 мыңнан 40 мыңға дейін сәлемдеме өтеді, және жақсы еңбек жағдайы жеткізу жылдамдығы мен сапасына тікелей әсер етеді. Қазақстанда жұмыс істейтін курьерлік компаниялардың басым бөлігі делдалдар. Олар тапсырыстарды қабылдап, кейін бізге тапсырады. Сәлемдемелердің негізгі бөлігі «Қазпошта» АҚ арқылы өтеді, себебі бізде Қазақстанның ең шалғай өңірлерін де қамтитын ең тармақталған филиалдар желісі бар.

Қуантарлығы, «Қазпошта» АҚ-ға жаңа басқарма төрайымы Әсел Жанасова келгеннен кейін компания айтарлықтай табыстарға қол жеткізді. 2023 жылы компания соңғы бес жылда алғаш рет 2,4 млрд теңге көлемінде таза пайдаға шықты. Алда үдерістерді одан әрі автоматтандыру жоспарда бар. Наурыз айында біз қойма үдерістерін оңтайландыруға арналған Toshiba Corporation роботтары мен сәлемдеме жеткізуге арналған қытайлық роботтардың таныстырылымын өткіздік.

Компаниядағы өзгерістерді онда екі жылдан бірнеше ондаған жылға дейін еңбек етіп келе жатқан қызметкерлердің өздері де байқады.
– Біздің міндетіміз сәлемдемелерді облыстар мен аудандар бойынша тарату, оларды бағыттарына қарай сұрыптау, – дейді сұрыптаушы Махшатова Гүлмарам. Қазір жағдай әлдеқайда жақсарды: кең, жарық, қажетті дүниенің бәрімен жабдықталған орын пайда болды. Таза сүзгіден өткен су, душ кабиналары, киім ауыстыратын бөлмелер, асхана, ыңғайлы жарықтандыру бар. Ұзақ ауысымнан кейін өзіңді ретке келтіруге болады, бұл күні бойы аяқта жүретін адам үшін маңызды. Бұрын мұндай жағдай болған жоқ.

– Еңбек жолымды 2009 жылы вокзалда бастадым, сәлемдемелерді вагондарға тиеумен айналыстым, тракторда және автокарда жұмыс істедім, – дейді Сағынтай Шайкенов. Ол кезде қыста біз жүкті тура далада тиейтінбіз, техника тоңатын, жұмыс өте ауыр еді. Қойма жетіспеді, сондықтан бәрін ашық аспан астында түсіруге тура келетін. Осы жаңа қоймада екі жылдан бері жұмыс істеймін. Ғимарат кең, техниканың қозғалысы дұрыс ұйымдастырылған. Курьерлер еш қиындықсыз келіп-кетеді, қыста бұрынғыдай қиындықтар туындамайды.

– «Қазпоштада» 2004 жылдан бері жұмыс істеймін, ал осы филиалда 2017 жылдан бері, – дейді аға қызметкер Куляш Дулатовна Ногайбаева. Бұған дейін вокзалда және «Кенмартта» жұмыс істедім. Жағдайды салыстырсақ, әрине, мұнда жақсырақ. Жалғыз минусы — жолдың алыстығы, бірақ бізде қызметтік тасымал бар.

– Мен мұнда 41,5 жыл жұмыс істеп келемін, ал ең басынан есептесек, одан да көп, – дейді компанияның байырғы қызметкері Татьяна Петровна. 1980 жылы мен оператор болып жұмысқа келдім, кейін декретке шығып, одан соң вокзалдағы пошта бөлімшесіне қайта оралдым. Әрине, еңбек жағдайындағы айырмашылық орасан. Бұрын вокзалдағы ғимарат ескі, кеңестік кезеңнен қалған екі қабатты, тар, төбесінен су ағатын орын еді, бірақ басқа жер болмағандықтан шыдадық. Адамдар бірінің үстіне бірі отырғандай тығыз жағдайда жұмыс істедік. Әсіресе жаңа жыл маусымында өте қиын болатын: бізге күніне 10-12 мың сәлемдеме келетін, әрі тәулік бойы жұмыс істейтінбіз. Қойма болған жоқ, пошта қыста қар астында көшеде сақталатын. Біз қарды аршып, поштаны сұрыптайтынбыз, ал күзетшілеріміз ұрланып кетпес үшін поштаны тәулік бойы күзететін. Қазір, әрине, жұмыс істеу әлдеқайда жақсы, мұнда жылы, жарық, жағдай жасалған. Бұрын қыста қол-аяғымыз тоңатын, тіпті жылытқыш алуға өзара ақша жинайтынбыз, ал қазір ондайдың қажеті жоқ. Таңертең және кешке қызметтік тасымал бар, бұл өте ыңғайлы. Жетпейтіні — шағын буфет қана, өйткені адамдар тәулік бойы жұмыс істейді, ал бір күнге жететін тамақты өзімен бірге алып жүру оңай емес. Әрине, бізде микротолқынды пеш, шәйнек бар, бірақ осы жерден бірдеңе сатып алып тіскебасар ету мүмкіндігі болса, өте пайдалы болар еді. Көптеген қызметкерлер осыны айтып жүр, себебі бізде шамамен 250 адам жұмыс істейді, сондықтан шағын буфет артық етпес еді.

– Біз Қазақстанда өнімділікке ғана емес, қызметкерлердің адалдығына, сервистің сапасына, түптеп келгенде тұтынушының қанағаттануына әсер ететін жаңа логистикалық мәдениетті қалыптастыру жолындамыз. «Қазпошта» АҚ-пен ынтымақтастық тәжірибеміз бір қарапайым, бірақ аса маңызды ақиқатты айқын көрсетті: адамдарға жұмыс істеу қаншалықты жайлы болса, олар өз міндеттерін соншалықты жылдам әрі сапалы орындайды. Бұл — Rainbow Logistics ұстанатын қарапайым, бірақ қағидатты тәсіл, мен оны алдағы барлық жаңа жобаларда да жүйелі түрде енгізе беруге ниеттімін, – деп түйіндеді Айбек Тұрсынғалиев.