«Астана кештері»: әлемді тоғыстырған музыкаға 15 жыл

2026 жылғы 9-11 қазан аралығында Астанада XV халықаралық «Астана кештері» өнер фестивалі өтті. Үш кеш бойы елордада әлемге әйгілі әндер, опера классикасы мен барокко дәуірінің музыкасы шырқалды. Мерейтойлық фестиваль Қазақстан, Италия, Франция, Беларусь, Өзбекстан және Оңтүстік Африка Республикасынан келген өнерпаздардың басын қосты. Шараны DEGDAR гуманитарлық қоры «Астана Опера» театрымен бірлесіп ұйымдастырды. Shanger.kz фестивальдің қалыптасу тарихына шолу жасап, биылғы мерейтойлық шарадан түсірілген фотосуреттерді назарларыңызға ұсынады.

«Астана кештері» фестивалінің тарихы 2012 жылдан басталады. Алғашқы фестиваль елорда күніне арналған музыкалық тарту ретінде ойластырылған болатын. Оның бастамашысы «Дегдар» гуманитарлық қорының Қамқоршылық кеңесін басқарған Дариға Назарбаева болды. Алғашқы концерттерді қор JTI компаниясымен бірлесіп ұйымдастырды.

Жобаның негізгі мақсаты - жоғары өнерді көпшілікке қолжетімді ету.

Алғашқы фестиваль 2012 жылғы 27-29 маусым аралығында өтті. Оның шымылдығы Дариға Назарбаеваның жеке концертімен ашылды. Кейінгі жылдары фестиваль сахнасында Қазақстан мен шетелдің танымал өнерпаздары өнер көрсетті. Ал 2012 және 2013 жылдардағы концерттерді белгілі музыкатанушы әрі тележүргізуші Святослав Бэлза жүргізді.

Уақыт өте келе фестиваль бағдарламасы классикалық музыка аясынан шығып, жанрлық тұрғыдан кеңейе түсті. Опера, симфониялық және камералық музыка, джаз, фольклор, эстрада мен хореография өнері бір сахнада тоғысты.

Әр жылдары фестивальге пианист Борис Березовский, скрипкашы Филипп Квинт, Үлкен және Мариин театрларының солистері, әнші Олег Погудин, джаз кернейшісі Вадим Эйленкриг және өзге де танымал өнерпаздар қатысты.

Қазақстан атынан Құрманғазы атындағы халық аспаптар оркестрі, Айман Мұсақожаева, «Сазген сазы» ансамблі, Тимур Урманчеев, отандық опера театрларының солистері және басқа да музыканттар өнер көрсетті.

Он бес жыл ішінде «Астана кештері» Қазақстандағы халықаралық деңгейдегі танымал музыкалық жобалардың біріне айналды. Ұйымдастырушылардың мәліметінше, осы уақыт аралығында фестивальге әлемнің ондаған елінен мыңнан астам әртіс пен шығармашылық ұжым қатысқан. Ал концерттерді 100 мыңнан астам көрермен тамашалаған.

2026 жылғы мерейтойлық фестиваль бағдарламасы әр дәуір мен түрлі жанрдағы музыканы қамтыды. 9 қазанда фестиваль «Қазақстан» орталық концерт залында Оңтүстік Африка Республикасынан келген әнші Белинда Дэвидстің өнер көрсетуімен ашылды. Ол әлемге әйгілі әнші Уитни Хьюстонның шығармаларын орындауымен танылған.

«Астана Опера» театрының симфониялық оркестрінің сүйемелдеуімен I Will Always Love You, I Wanna Dance with Somebody және басқа да танымал әндер шырқалды. Оркестрге италиялық дирижер Роберто Молинелли жетекшілік етті. Кештің арнайы қонағы италиялық рок-әнші Симоне Романато болды.

10 қазанда «Астана Опера» театрының сахнасында Non-Stop OPERA шоуының премьерасы өтті. Астана, Алматы және Ташкент опера театрларының тоғыз солисі 12 операдан 17 музыкалық нөмір орындады. Бағдарламаға Россини, Верди, Оффенбах және басқа да композиторлардың шығармалары енді. Оркестрге Қазақстанға алғаш рет келген италиялық дирижер Этторе Пападиа жетекшілік етті. Ұйымдастырушылар бұл қойылымды театрдың тұрақты репертуарына енгізуді жоспарлап отыр.

11 қазанда фестиваль барокко дәуірінің музыкасына арналған Barocco концертімен аяқталды. Дирижер Евгений Бушковтың жетекшілігімен Вивальди, Бах, Гендель және Марчелло шығармалары орындалды.

Оркестрмен бірге француз гобойшысы Жером Гишар, қазақстандық флейташы Ержан Кушанов және Тимур Урманчеев жетекшілік ететін Қазақстанның мемлекеттік FORTE TRIO триосы өнер көрсетті. Кештің ерекше тосынсыйы Питер Брайнердің The Beatles тобының әндері негізінде Вивальди стилінде жазған концертінің екі бөлімінің орындалуы болды. Осылайша көпшілікке жақсы таныс әуендер мүлде жаңа қырынан естілді.

2026 жылы DEGDAR гуманитарлық қоры құрылғанына 25 жыл толуын атап өтуде. Ширек ғасыр ішінде қор жүздеген қайырымдылық, білім беру, әлеуметтік және мәдени жобаларды жүзеге асырды. Ал «Астана кештері» осы уақытқа дейін қордың ең ауқымды музыкалық жобасы болып келеді.